سناء عكرود لمنتقديها: بلا ماتهزو ليا الهم!
علقت الفنانة، سناء عكرود، على منتدقي دخولها المطبخ، وإهمالها نفسها وعملها كفنانة.
ونشرت عكرود على حسابها الرسمي على إنستغرام، تدوينة كتبت فيها: « كيكتبو ليا بعض الناس وكيقولوا : قابلتي الطواجن والكوزينة والولاد ونسيتي راسك وخدمتك بلا ما تهزوا ليا الهم، كندير الولاد وكنرضعهم ونا هازة كتاب فيديا، كنتصور معاهم ونا مشنتفة وماشابعاش نعاس، ولكن فالغد ليه كنلبس مزيان و نخرج ونسهر ونشطح ونموت بالضحك، كنكتب وكندير الاخراج والانتاج والتمثيل ».
وتابعت: « خديت جوائز وشهرة واشادة بالخدمة ديالي الحمد لله والشكر لله، و للإشارة فقط، فاش علنوا بلي خديت ثلاثة ديال الجوائز هنا فكندا على الفيلم الاخير ديالي « ميوبيا « ، كنت فالكوزينة مشنتفة و هازة مغرفة كتحرك لا صوص لسباكيتي للعشا، وشطحت بالفرحة أنا والمغرفة ديالي وولادي.
كنكون بلدية ومدينية، كنهز الحطب ونسكي الما ونكول اكسيون، كنهز بنتي فشوني وهي عندها ستة أشهر وكنطلع للمسرح باش نتسلم جائزة الاخراج وجائزة التمثيل والجائزة الكبرى على عمل كتبتو ومثلت فيه ودرت ليه الاخراج فاش كنت مقابلة الطواجن والكوزينة والولاد ».
وأضافت: « العيالات فالعالم كلو كيديرو بحالي وأكثر، حتى حاجة ما كتخلعنا، ماشي حيث حنا شدادات أو بغينا نتبتوا للعالم شي حاجة، لا، حيث حنا : عيالات. بلا ماتهزو ليا الهم صافي.. ».
